رۆژا ئێكشەمبی رێكەفتی ٢٦-٢-٢٠١٧ به‌رێز ماموستا صلاح الدین محمد بهاء الدين سه‌ره‌دانا مه‌لبه‌ندێ نه‌هێ ئاكرێ یه‌كگرتووی ئیسلامی كرو ژبال به‌رپرس و كاگێرو كادرێن یه‌كگرتوو ل ده‌ڤه‌رێ ب گه‌رمی پێشوازی لێ هاته كرن و پاشی ئه‌مینداری چه‌ندین سه‌ره‌دانێن كومه‌لایه‌تی ئه‌نجام دان و لداویێ ژی كومبونه‌كا به‌رفراوان دگه‌ل رێكخستنێن یه‌كگرتوو ل ده‌ڤه‌رێ ئه‌نجام دان ئه‌ڤه‌ژی كورتیا په‌یڤا وی یه....
ئەمیندارێ گشتی یێ یەکگرتوو: دڤێت هه‌مى ئالیه‌ك كار بكه‌ت بۆ چاكسازيێن راسته‌قینه د ره‌وشا سیاسی و ئابورى دا
د چارچووڤێ دیدار و کومبونێن ماموستا سەلاحەدین محمد بھاءالدین ئەمیندارێ گشتی یێ یەکگرتوو، د سەرەدانا ویدا بۆ ئاكرێ، دگەل رێکخستی و کادرێن پێشکەفتی یێن یەکگرتوو ل سنورێ مەلبەندێ 9 کومبوو.
دڤێ کومبوونێ دا، ئەمیندارێ گشتی یێ یەکگرتوو بەحسێ کاروانێ خەباتا یەکگرتوو کر، و دیارکر ڤی تەمەنی دا یەکگرتوو خزمەتەکا زور د کاروبارێن دەعوە و خزمەتگوزاری و پەروەردەیی و سیاسی پێشکێشکرینە، ماموستای دیارکر نەھجێ یەکگرتوو بۆ ساحا سیاسی و ھەمی لایەنان دیاربوو، یەکگرتوو پێدڤیا مەیدانا سیاسی یە و بالانسا ھێزێ یە و یەکگرتوو نە سەنگەری بۆ کەسێ دکەت و نە دژی کەسێ سەنگەری دکەت، یەکگرتوو سیاسەتا خۆ یا ھەی و ئەڤا د خزمەتا مللەتی دا بیت دکەت.
ئەمیندارێ گشتی یێ یەکگرتوو گوت ژی یەکگرتوو ھەمی گاڤا خەما وێ ئاشتەوایا نشتیمانی بویە و رێکخستنا ناڤ مالا کوردی و ئەڤ رەوشا سیاسی پێدڤی ب چارەسەریێ و لێکتێگەھشتنێ ھەیە و ھەولێن یەکگرتوو د بێ مفا نەبویە و ھیڤیە پتر کار بێتە کرن بۆ ڤێ چەندێ و ئەم د گەل وێ ئێکێ نە چ لایەن نەھێتە دویرکرن.
ئەمیندارێ گشتی ئاماژە پێکر، یەکگرتوو د دوو کونگرێن چویی دا سەربەخووبوونا کوردستانێ کریە سراتیژیەتا خۆ یا ئێکێ و مافێ گەلێ کوردە دەولەتا خۆ یا سەربەخویی ھەبیت و ھەکە ئاستەنگ ژی ل ھەمبەر سەربەخووبوونا کوردستانێ ھەبیت، لێ نەمەحالە چوونکە رەوشا سیاسی و دەرفەتێن مێژوویی و رولێ کوردان د شەرێ داعش دا و بەرژەوەندیێن دەولی دبیت ببنە رێخوشکەر ل ھەمبەر ڤێ چەندێ و لێ یا گرنگ دڤێت کورد ناڤمالیا خۆ بھێز بێخن و ناکوکیێن خۆ بدەنە لایەکی.
ئەمیندارێ گشتی یێ یەکگرتوو د کومبوونا خۆ یا دگەل کادرێن پێشکەفتی یێن یەکگرتوو ئاماژە پێکر، یەکگرتوو چو جاران نە د گەل لایەنەکی بوویە دژی لایەنەکی و یەکگرتوو د گەل خۆیە و دبیت بووچونا وێ جاران ھەڤرا بیت دگەل لایەنەکی لێ مە ھەمی گاڤان کار بۆ چاکسازیا سیاسی کریە و ل ھیڤیا کەسێ ژی نەبوینە سوپاسیا وێ بکەت.
ماموستا سەلاحەدین ی دیارکر ژی یەکگرتوو د ناڤخویا خۆ دا یا موکمە و شانازیە بۆ یەکگرتوو د ڤان بیست و سێ سالان دا چ ئینشقاق دناڤ وێ دا روی نەداینە و کارێ یەکگرتوو کارەکێ مروڤی یە و مروڤ یێ ژ کێماسیان بێ بەھر نینە.
ئەمیندارێ گشتی یێ یەکگرتوو گوت ژی "تورکیا و ئیران دوو دەولەتێن گرنگن ل دەڤەرێ و پەیوەندیێن مە دگەل وان د باشن ژبۆ خزمەتکرنا گەلێ کوردستانێ.
سەبارەت پروژێ ھەڤکاری و لێکنێزیکبوونا ئالیێن ئیسلامی ماموستا سەلاحەدین ئاماژە پێکر، ڤی پروژەی پێنگاڤێن باش ھاڤێتینە و یەکگرتوو دێ یا بەردەوام بیت و ب ھیڤیە ژی ئەڤ ھەولە سەربگرن.
ماموستا سەلاحەدین گوت ھەلبژارتن دێ پروسێسا دیموکراسیەتێ ل ھەرێما کوردستانێ بەتە پێش و پێدڤیەھەمی ئالی خۆ ئامادە کەن دا بەرەف قوناغەکا دی بچین و دا چاکسازیەکا راستەقینە د رەوشا سیاسی و ئابوری دا بێتە کرن.
ل دوماهیا كومبوونێ دا ئەندام رێكخستنێن یەكگرتوو ب تێبینی و پێشنیارێن خو كومبوون دەولەمەند كر و پەیمانا خزمەتێ ب هزرا ئیسلاحی یا میانرەوی و یەكگرتوویا ئیسلامیا كوردستانێ دووباتكر.