پێشنیوڕۆی ئەمڕۆ پێنج شەممە 25-1-2018 مامۆستا صلاح الدین محمد بهاء الدین ئەمینداری گشتی یەكگرتووی ئیسلامی كوردستان و شاندێكی یاوەری سەردانی مامۆستا عیرفان عبد العزیز ڕابەری گشتی بزووتنەوەی ئیسلامی كرد لەسلێمانی و لەمیانەی كۆبونەوەیەكدا گفتوگۆ دەربارەی بارودۆخی عێراق و هەرێم و ناوچەكە كراو جەختیش لەسەر گرنگی زیاتر بە پەیوەندیەكانی نێوان بزوتنەوەی ئیسلامی و یەكگرتووی ئیسلامی كرایەوەو هەروەها گفتوگۆ دەربارەی مامەڵەی لایەنە سیاسیەكان لەسەر پێشهاتە نوێیەكان لەناوچەكە بەتایبەت پرسی كورد كراو هەردوولا هاوڕابون لەسەر یەكڕیزی و یەك هەڵوێستی سەرجەم لایەنەكان لەپرسە چارەنوس سازەكاندا.
دواتر لەمیانی كۆنگرەیەكی ڕۆژنامەوانی هاوبەشدا كامیل مەحمود ئەندامی مەكتەبی سیاسی بزوتنەوەی ئیسلامی وردەكاری زیاتری كۆبونەوەكەی خستەڕوو ڕایگەیاند: سەرەڕای بەشدارینەكردنیان لەهەڵبژاردنەكانی عێراق بەڵام دەنگەكانی بزوتنەوەی ئیسلامی بۆ یەكگرتوو ئیسلامی كوردستان دەبێت.
هەروەها ڕونیشی كردەوە كە هەردوحیزب بەردەوام دەبن لەكاری هاوبەش تاوەكو دروستكردنی لیستی هاوبەش بۆ هەڵبژاردنەكانی كوردستان.