ئەمرۆ پێنج شەممە (م. سەڵاحەددین موحەمەد بەهائەددین) ئەمینداری گشتی یەكگرتووی ئیسلامی كوردستان بەئامادەبوونی (سەمیر سەلیم و فەرهاد مەلا ساڵح) كارگێرانی ئەنجوومەنی جێبەجێكردن لە نووسینگەی تایبەتی خۆی لەهەولێر پێشوازیانكرد لە وەفدێكی باڵای بزووتنەوەی گۆڕان بەسەرپەرشتی (عومەر سەید عەلی) رێكخەری گشتی بزووتنەوەكەو هەریەكە لە (جەلال جەوهەر و م. رەئوف و كاك هۆشیار و كاك شوناس).
لەدانیشتنێكی دۆستانەدا دۆخی سیاسی هەرێم و عێراق و ناوچەكە شیكرایەوەو پەیوەندی نێوان هەردوولاو لایەنە كوردستانییەكان تاوتوێكرا.
هەردوولا هاوڕابوون لەسەر گرنگی بەرێوەچوونی هەڵبژاردنەكان لەم ساڵدا بەپاك و بێگەردی بۆ دەرچوون لە قەیرانی سیاسی هەرێم وەك باشترین بژاردەو چارەسەركردنی بژێوی مووچەی فەرمانبەران بەئەركێكی هەنوكەیی حكومەتی هەرێم و حكومەتی فیدڕاڵی زانرا كە چیتر نابێت هاوڵاتیان باجەكەی بدەن و پشتیوانی خۆیان دووپاتكردەوە بۆ هەرچی زوتری چارەسەری بژێوی و مووچەو پێویستە فشار بخرێتە سەر لایەنە پەیوەندیدارەكان و دۆستانی گەلەكەمان لەناوەوەو دەرەوەی ووڵات.
سەبارەت بەهەڵبژاردنی عێراقیش خاڵێكی گرنگ دەست نیشانكراوە خواستی هەردوولا جەختی لێكرایەوە لەسەر گرنگی ناوچە دابرێنراوەكان بەتایبەت پارێزگای كەركوك و چارەسەركردنی ئەو دۆخە نەخوازراوەی كە هاتۆتە ڕێ.
لە كۆتاییدا وەفدی میوان خۆشحاڵی خۆیان دەربڕی بە پێشوازی گەرمی یەكگرتوو و هەنگاوەكانی یەكگرتوویان لەئێستاو رابردوو بەرزنرخاند.
ئـ . كـ