بەیاننامەی ئەنجوومەنی جێبەجێكردن
بەبۆنەی (٣٠ )هەمین ساڵڕۆژی راگەیاندنی یەكگرتووی ئیسلامیی كوردستان.
بەناوی خوای گەورە و میهرەبان
هاوڵاتیانی هەرێمی كوردستان..
ئەندام و لایەنگرانی یەكگرتوو..
سڵاوی خوای گەورەتان لێبێت...
پێش (٣٠ )ساڵ و لە بەرواری ( ١٩٩٤/٢/٦)، پۆلێک لە خەمخۆرانی ئیسلام و، دڵسۆزانی شوناس و، دۆزی ڕەوای گەل و نیشتمان، (یەكگرتووی ئیسلامیی كوردستان) یان لەژێر دروشمی (ئازادی، برایەتی، دادپەروەری)دا راگەیاند، لە بەیاننامەی راگەیاندندا؛ یەکگرتوو چەندین بنەما و چەمكی نوێی خستە گۆڕەپانی سیاسی و حیزبایەتی ئەو قۆناغەی ژیانی سیاسی کوردستانەوە، وەك (رێزگرتن لە كەرامەتی مرۆڤ) و، (پاراستنی سەربەستییەکان و ئازادی بیروڕا) و، (دابینكردنی دادپەروەری و بنبڕكردنی ستەم) و، (میانەڕەوی لە فیكر و مومارەسە) و، (پێكەوەژیان و هاوكاریكردن) و، (رێزگرتن لە حوكمی یاسا) و (چاكسازی كۆمەڵایەتی و سیاسی و ئابووری) و، (خەباتی سیاسی و مەدەنی دوور لە چەکداری) و، (بەشداریکردنی کارای خوشکان لە کاری سیاسی و رێکخراوەیی و گرنگیدان بە رۆڵی قوتابیان و گەنجان و پەروەردەکردنیان) و ...هتد.
لە ماوەی ( ٣٠ )ساڵی رابردوودا، یەکگرتوو هەوڵی بەردەوامیداوە تا ئەو دروشم و بنەما و چەمكانە بەكردەوە مومارەسە و جێبەجێبکات و، هەروەک کردویەتی، بەڵکو ویستویەتی بۆچوون و قەناعەتەكانی بگوازێتەوە بۆ دۆستەكانی لە گۆڕەپانی سیاسی هەرێمی كوردستان، بەو ئومێدەی تێگەیشتنێکی راست و دروست بخاتە گۆڕەپانی دینداری و فیکری ئیسلامی و، مۆدیلێکی شارستانی و سەردەمیانەی کاری سیاسی و حزبی بچەسپێت و، ئارامی سیاسی و ئاشتی کۆمەڵایەتی باڵبکێشێ بەسەر هەرێمی کوردستان و، هاوڵاتیان بە خۆشگوزەرانی و ئاسودەیی بژین و، ئەزموونی کوردستان ببێتە نمونەیەکی سەرکەوتوو لە ناوچەکەدا.
یەکگرتوو ( ٣٠ ) ساڵە قوربانی بۆ ئەو دروشم و بنەماو چەمکانە دەدات و، لەو پێناوەشدا مەحرومیەتى زۆری بينيوه و فیداکاری و شەهیدی بەخشیوە، پشت بە خوای گەورە، هەر بەردەوامیش دەبێت لەسەر ئەو ئەرکە ستراتیژییە نیشتیمانییە.
سوپاس بۆ خوای گەورە، ئەوسا و ئێستاش، یەكگرتووی ئیسلامیی کوردستان، هێزێکی سیاسی و کۆمەڵایەتی و فیکری کاریگەر و دڵسۆز و رێزلێگیراوی مەیدانی سیاسی هەرێم و عێراقە، خاوەنی راستگۆیەتی سیاسیی و گەورەترین سەرمایەی مرۆییە، تەنانەت بە گوتار و رەفتار و كردار و میكانیزمی كاركردنی تایبەت بە خۆی، ناسراوە و دەناسرێتەوە..
هاوڵاتیانی خۆشەویست..
یەكگرتووی ئیسلامیی كوردستان، لە كاتێكدا ئەم یادە دەكاتەوە، كە بەداخەوە هەرێمی كوردستان بە قۆناغێكی سەختی سیاسی و ئابووریدا تێپەڕدەبێت، پەرلەمانی ماوەبەسەرچوو لەکارخراوە ، حکومەتیش هەر ماوەبەسەرچووە ، بەمەش شەرعیەتی دەسەڵات لەژێر پرسیاردایە ، کەچی لەگەڵ ئەوەشدا تا ئێستا وادەی هەڵبژاردنی داهاتووی پەرلەمان دیار نیە .
هەروەها لە بەرئەنجامی ئیدارەدان و بەرێوەبردنێكی نادروست و، كەڵەكەبوونی کێشەکان و، خەمساردی لە چارەسەرکردنیان، چەندین قەیرانی دارایی و بنبەستی سیاسی و شڵەژانی ئەمنی و دڵەڕاوکێی کۆمەڵایەتی و كێشەی كارگێڕی و خراپی خزمەتگوزاری و بێئومێدی سەریهەڵداوە، لەگەڵ هەموو ئەمانەشدا، خەڵک لە دۆخێکی ژیان و ئابوری و دارایی سەخت و دژواردا دەژین، ئەویش بەهۆی زۆرى باج و خەراجی سەرشانی هاوڵاتیان و، دابەشنەكردنی سێ موچەی ساڵی رابردوو، هەر ئەمەش هۆکاری سەرەکی بایکۆتی مامۆستایان و فەرمانبەرانە، کە زیاتر لە چوار مانگە لە دەڤەری سلێمانی و هەڵەبجە و گەرمیان و ڕاپەڕین و کۆیە بەردەوامە، بێ ئەوەی داوا رەوا و یاساییەکانیان بۆ جێبەجێبکەن، بەوەش باری سەرشانی مامۆستایان و موچەخۆران ئەوەندەی تر قورس و، درزی نێوان جەماوەر و دەسەڵات فراوانتر بووە، گەیشتۆتە ئاستێک، ئەگەر بە خێرایی رێگەچارەی پەلە و كرداری و جددی نەگیرێتەبەر و هەڵبژاردنێکی پاک و بێگەرد نەکرێت ، رەوشەكە دژوار و ئاڵۆزتر دەبێت، لە ئێستادا خەڵک بەگشتی لەوپەڕی کەمدەرامەتی و هەژاری و بێئومێدی دایه، پێویستە لەوە زیاتر گرێی دەست نەخرێتە ددان .
له‌لایه‌كی تره‌وه، ره‌وشی عێراق و ناوچه‌كه و جیهان، قه‌یراناوی و مه‌ترسیداره، زیاتر لە چوار مانگە قەوارەی زایۆنیزم لە پێش چاوی جیهان و بەژێرپێخستنی هەموو یاسا و بەها مرۆیی و نێودەوڵەتیەکان هاوڵاتیانی غەززە و فەلەستین کۆمەڵکوژ و جینۆساید دەکات ، خەڵکی غەززەش درەوشاوەترین نمونەی خۆراگری و قوربانیدان و فیداکاری پێشکەش دەکەن، پشت بەخوا سەرکەوتنی گەورە چاوەڕوانی غەززەیە . هه‌رێمی كوردستان بە بیانووی ناڕەوا و جیاجیا درۆن و موشک باران دەکرێت و له‌به‌رده‌م هه‌ڕه‌شه‌ی جددیدایه و، بۆته گۆڕه‌پانی یه‌كلاكردنه‌وه‌ی كێشه ئیقلیمی و نێوده‌وڵه‌تیه‌كان، ئێمه له یه‌كگرتووی ئیسلامیی كوردستان، به نیگه‌رانیه‌كی قوڵه‌وه سه‌یری ئه‌م دۆخه ده‌كه‌ین و، ده‌خوازین ده‌سه‌ڵات و بڕیار به‌ده‌ستانی هه‌رێم به‌وپه‌ڕی جددی و
به‌رپرسیارانه‌وه مامه‌ڵه‌ی ئەم دۆخە هەستیارە بکەن و، هه‌نگاوی خێرای چاره‌سه‌كردنی بنێن، به هه‌مان شێوه چاره‌سه‌ری كێشه و گرفته ناوخۆییه‌كانیش بكه‌ن و، ناکۆکییە حیزبیەکان وەلابنێن و، بەرژەوەندییە گشتییەکان بخەنە پێش بەرژەوەندییە حیزبییەکان، ئاشکرایە کە یەکڕیزی و یەکهەڵوێستی پێویستییەكی هەنوكەییە بۆ چارەسەركردنی كێشە و قەیرانەكان.
ئه‌ندام و لایه‌نگرانی یه‌كگرتوو..
له‌م بۆنه‌یه‌دا ده‌مانه‌وێت سوپاس و ده‌ستخۆشی ئاراسته‌ی یه‌كه‌یه‌كه‌تان بكه‌ین و، هەوڵ و ماندوبوونه‌كانتان له‌ماوه‌ی ( ٣٠ ) ساڵی رابردوودا به‌رز ده‌نرخێنین و، داواكارین له خوای گه‌وره، له هه‌موو لایه‌كمانی قبوڵ كردبێت و، ببێته توێشووی قیامه‌تمان، خوای بەخشندە فیرده‌وس بكاته شوێنی ئه‌و خوشك و برایانه‌مان كه پێش ئێمه گه‌ڕاونه‌ته‌وه به‌ر ره‌حمه‌تی خوا.
له كۆتاییدا، په‌یمان نوێده‌كه‌ینه‌وه كه به‌رده‌وام ده‌بین له‌سه‌ر خزمه‌تكردنی په‌یامی پیرۆزی ئیسلام و گه‌ل و وڵاتمان .
جارێکی تر پیرۆزبێت یادی ( ۳۰ ) ساڵەی ڕاگەیاندنی یەکگرتووی ئیسلامیی کوردستان، سەرکەوتوو بێت ئیرادەی خزمەت و چاکسازی.
هه‌ر شاد و سه‌ركه‌وتووبن.
ئه‌نجومه‌نی جێبه‌جێكردنی
یه‌كگرتووی ئیسلامیی كوردستان