پشتی نیڤرویا روژا دووشه‌مبی 24/9/2018 ب به‌رهه‌ڤبونا ماموستا (سه‌عید عه‌لی عه‌بو) سه‌روكێ ئه‌نجومه‌نێ سه‌ركردایه‌تیا یه‌كگرتوویی ئیسلامی كوردستان و ژماره‌كا ئه‌ندامێن ئەنجومەنێ جێبەجێکرن وسه‌ركردایه‌تی و ئه‌نجومه‌ن و ده‌زگه‌هێن یه‌كگرتوو و بەرپرسێن مەلبەندا و جێگرێ پارێزگارێ دهوک و پەرلەمانتار و نوینەرێن یەکگرتوو د حکومەتا خوجهی یا پارێزگەها دهوک دا و جه‌ماوه‌رەکێ زور و دلسوزێن یه‌كگرتوو كه‌رنه‌ڤالێ سه‌ركه‌فتنا لیستا 119 ل باژێرێ دهوك هاته ئه‌نجام دان.
د رێورەسمێن کەرنەڤالی دا سەروکێ سەرکردایەتیا یەکگرتوو پەیامەک پێش کر و راگەهاند کو ئه‌ڤرو كوردستان و خه‌لكێ كوردستانێ به‌رب قویناغه‌كا نوى و هه‌ستیارڤه د چن ، ژبو هه‌لبژارتنا نوینه‌رێن خو ل په‌رله‌مانێ كوردستانێ ، و ئه‌م ( یه‌كگرتووى ئیسلامى كوردستان ) ب شانازیڤه و ب ناڤێ خودێ و پاشى ب پشته‌ڤانى و هاركاریا هه‌وه دگه‌ل برایێن خو ژ دلسوز و خه‌مخورێن دین و وه‌لاتى د لیستا ( به‌ره‌ڤ ئیسلاحێ) دا (لیستا 119) كومه‌كا ده‌ست پاك و دلسوزان به‌ربژێر دكه‌ین ، بو نینه‌راتیا هه‌وه ب باشترین و بلندترین و هه‌ژیترین ئاست و شێواز ، كو ل ئاستێ جامێرى و قوربانیدانا هه‌وه‌یێن به‌رێز و خوشتڤى بیت ..
ماموستا سەعید علی عبوی د درێژیا پەیاما خودا ئاماژە دا وێ چەندێ کو ئیصلاح بنه‌مایه‌كێ قورئانیه و گازییه‌كا خودایى یه هه‌روه‌سا سیسته‌مێ حوكمرانیا هه‌رێمێ د ماوێ بوریدا توشى حاله‌ته‌كێ سه‌قه‌ت و ئیفلنج بویه ، و ئه‌ڤ چه‌نده بویه ئه‌گه‌ر و ژێده‌رێ گه‌نده‌لى و قه‌یران و پاشكه‌تنێ و هه‌مى سیسته‌مێ سیاسى و ئیدارى و ئه‌منى ل كوردستانێ پێدڤى لێزڤرین و چاكسازیێن راسته‌قینه‌یه ... ، چاكسازى تاكه رێكا چاره‌سه‌ریێ یه، بو هه‌مى ڤێ گه‌نده‌لیێ و قه‌یرانێن هه‌رێم كه‌تیێ و ژبو ئاڤاكرنا سیسته‌مه‌كێ ساخله‌م و وه‌لاته‌كێ ئاڤا و هاووه‌لاتیه‌كێ به‌خته‌وه‌ر و بێ مننه‌ت پشته‌ڤانێن لیستا ( به‌ره‌ڤ ئیسلاح) (لیستا 119) بن چونكى چاكسازى ب مروڤێن چاك و ده‌ستپاك دهێته‌كرن و ب هه‌لبژارتنا وان دێ ده‌لیڤه‌كا باش بو چاكسازیێن راسته‌قینه هێته پێش .
سەروکێ سەرکردایەتیا یەکگرتوو ئەو چەندە ژی گوت کو به‌ربژێرێن لیستا ( به‌ره‌ڤ ئیسلاحێ ) (لیستا 119) كه‌سێن جه‌رباندینه ، و هه‌مى شاهده‌یێ بو ژێهاتى و لێهاتنا وان دده‌ن ، و ل هه‌ر جه وده‌مه‌كى جهێ سه‌ربلندى و شانازیێنه ، و هه‌رده‌م به‌رژه‌وه‌ندیا خه‌لك و خاكى به‌رى به‌رژه‌وه‌ندیا خو ددانن ، و پێخه‌مه‌ت به‌رژه‌وه‌ندیا خه‌لكێ خو د ئاماده‌نه هه‌مى ره‌نگێن قوربانیان پێشكێش بكه‌ن ، و مێژوو و وژدانا خه‌لكێ ب وژدان ل سه‌ر ڤێ راستیێ شاهدن ، به‌ربژێرێن مه د ده‌ستپاكن له‌وما ب ده‌نگێ بلند و سه‌رێ بلند به‌حسى چاكسازیان دكه‌ن , به‌ربژێرێن مه دیرن ژ خیانه‌تێ ، له‌وما ب هه‌مى شیان دژى خیانه‌تێ دراوه‌ستن , ئه‌ڤان به‌ربژێرا پروژه و پێشنیارێن هه‌ژى دده‌ستدانه ژبو كاراكرنا په‌رله‌مانى و ب یاساكرنا كاروبارێت هه‌مى ئورگانێت حكومى و لێگه‌ریان ل هه‌مى ماف وشایسته‌یێن خه‌لكێ كوردستانێ و دیاركرنا داهات وسامان و داریی یا حكومه‌تێ ب ره‌نگه‌كێ شه‌فاف و دیار .
ل دوماهیا پەیاماخودا ماموستا سعید علی عبوی گرنگیا بەژداریا هەلبژارتنا بو ئامادەبویان دا دیارکرن و گوت:تو ب پشكداریا خو .... دێ ڤێ پروسێ سه‌رئێخى و ب ده‌نگێ خو دێ شورشا گهورینێ ل كوردستانێ ب هێزئێخى چونكى ده‌نگێ ته سه‌نگ و هێز و گهورینه ، و ب ده‌نگدانا ته دێ ده‌رگه‌ه و ده‌لیڤان ل گه‌نده‌لیێ گرى و دێ توخیبه‌كى بو ب هه‌دردانا سامانێ ڤى وه‌لاتى دانى و دێ بیه ئه‌گه‌رێ خوشگوزه‌رانى و راگرتنا ماف و كه‌رامه‌تا مروڤى ل كوردستانێ ، و دا جاره‌كا دى هه‌مان سیسته‌م و ئه‌زموون دوباره‌نه‌بیت ، ب هه‌مى به‌رپرسیارى و ئه‌مانه‌ت ، وژدانا خو ئارام بكه و ببه به‌شه‌ك ژ ڤى پروژێ پیروزێ چاكسازیێ و ببه هاریكار و پشته‌ڤانێ مروڤێن چاك و پاك و خێرخواز و خه‌مخور و دلسوز ، .. ب هه‌مى گه‌رم و گوڕى ئاماده‌یى سه‌ر سندوقێن ده‌نگدانێ ببن و ده‌نگى بده‌نه لیستا ( به‌روڤ ئیسلاح) (لیستا 119) بۆ پاشه‌روژه‌كا گه‌شتر و ژیانه‌كا خوشتر و سیسته‌مه‌كێ ساخله‌متر و وه‌لاته‌كێ ئارام و ئاڤاتر ..
هیڤیدارین ئه‌ڤ پروسه ب سه‌ركه‌فتیانه ب رێڤه بچیت و ئه‌م هه‌مى ئارامى و ته‌ناهیێ راگرین و هه‌ڤركییا سیاسى و حزبى نه‌بیته ئه‌گه‌رێ تێكدانا ره‌وشێ و رویێ كوردستانێ جوان بكه‌ین ب جوان راگرتنا ده‌نگدانێ دویر ژ سه‌خته‌كارى و پێشێلكاریان و هیڤیدارین كوردستان هه‌ر یا ئارام و ئاڤا بیت و خه‌لكێ كوردستانێ هه‌رێ شاد و سه‌رفه‌رازبیت و سلاڤ بو هه‌مى مالباتێن سه‌ربلندێن شه‌هیدان
سلاڤ بو هه‌مى پێشمه‌رگێن قاره‌مان
سلاڤ بو هه‌مى خه‌لكێ كوردستانێ ب هه‌مى نه‌ته‌وه و ئایینانڤه
سلاڤ بو هه‌مى چاكساز و ئیسلاح خوازان
سلاڤ ل سه‌ر وه هه‌میان بن و ل بن چاڤدێریا خودایێ دلوڤاندا بن
و خودێ هاریكار و پشته‌ڤانێ وه بیت و به‌ره‌ف سه‌ركه‌فتنان ب ئانه‌هیا خودێ
سه‌ركه‌فتنا لیستا ( به‌ره‌ڤ ئیسلاح) (لیستا 119) كو سه‌ركه‌فتنا هه‌میانه
سوپاس بۆ هه‌وه هه‌میا