قال تعالی (ۆلِتُكْمِلُواْ الْعِدَّة ۆلِتُكَبِّرُواْ اللّهَ عَڵی مَا هَدَاكُمْ ۆڵعَلَّكُمْ تَشْكُرُونَ) البقرە 185
پیرۆزباهی
بهه‌لكه‌فتا جه‌ژنا ره‌مه‌زانا پیرۆز ئه‌م ل ئه‌نجومه‌نێ كاروبارێن بانگه‌وازا یه‌كگرتووی ئیسلامی كوردستان جوانترین پیرۆزباهیان لته‌ڤایا موسلمانێن جیهانێ وبتایبه‌تی خه‌لكێ كوردستانێ دكه‌ین، هیڤیخوازین جه‌ژنا خێر وخۆشی وئێمناهی بیت، ودویماهی هاتنا هه‌می قه‌یران وئالۆزیان بیت بۆ گه‌لێ كوردستانێ وعیراقێ وهه‌می گه‌لێن موسلمان وجیهانێ.
سوپاسیا خودایێ مه‌زن دكه‌ین لسه‌ر هه‌می نیعمه‌ت وخه‌لاتێن وی، بتایبه‌ت به‌ره‌كه‌تا ئیمانێ وهه‌یڤا ره‌مه‌زانێ وره‌نگڤه‌دانا پیروزیا وێ دناڤ هه‌می ته‌خ وجوینێن ملله‌تێ مه‌دا ب ئه‌نجامدانا كارێن ژ هه‌ژی وه‌ك گرتنا ڕۆژیان وكرنا نڤێژان وچۆنا به‌ره‌ف مزگه‌فتان ، وهاریكاریا ته‌خا هه‌ژار و كێم ده‌رامه‌ت ژ لایێ ده‌وله‌مه‌ند و رێكخراوانڤه ب به‌خشینا زه‌كاتێ وهه‌می ره‌نگێن هاریكاریێ، و به‌ربه‌لاڤبوونا گیانێ ته‌بایی ومرۆڤاتیێ ولێبۆرینێ دناڤ هه‌می جڤاكیدا،كو جهێ رێز و سوپاسیێ یه ونیشانا زیندی وئێكگرتن وته‌باییا ملله‌تێ مه‌یه. هیڤیخوازین ئه‌ڤ كار و چاكییه دبه‌ردوامبن وخودایێ مه‌زن ژ هه‌میان قه‌بیل كربیت.
هێژایان
ئه‌م گه‌هشتینه جه‌ژنا ره‌مه‌زانا پیرۆز وهیشتا عیراق وكوردستان لژێر چه‌ندین قه‌یرانێن ئالوز یێن سیاسی ودارایی دنالیت بتایبه پشتی هه‌لبژارتنێن ئه‌نجومه‌نێ نوینه‌رێت عیراقێ وئه‌و پێشێلكرنا رێكخستی تێدا هاتیه كرن، ناكوكی ودووبه‌ركی جاره‌ك دی سه‌رهه‌لدا وخه‌لك توشی ترس ودوودلیێ كر، وئه‌ڤرۆ خه‌لك كه‌فتیه ژێر گڤاشتنێن دژوار، له‌و پێدڤیه هه‌می ده‌زگایێت فه‌رمی ولایه‌نێن سیاسی د نێزیكترین ده‌مدا رێكه‌چاره‌یه‌كا سیاسی ویاسایی بۆ ڤان قه‌یرانان ببینن وجاره‌ك دی گیانێ ئێكرێزی وئێك دوو قه‌بولكرنێ، ئاشتبوونه‌كا نشتیمانی بچه‌سپینن.
ولایه‌نێن كوردستانی بگیانه‌كێ نشتیمان په‌روه‌رانه دویر ژ سه‌خته‌كاری وگه‌نده‌لی وپێشێلكرنا یاسایێ وبه‌رژه‌وه‌ندیێن حزبی وكه‌سوكی بینن وخۆ لبه‌رژه‌وه‌ندیێن خه‌لكێ كوردستانێ بكه‌نه خودان ، دا بشێین بهه‌ڤڕا مافێت دستوری بڤه‌گه‌رینن وبده‌ستڤه‌بینین، ودوماهیێ بڤان قه‌یرانان بینن.
و لدوماهیێ
پیرۆزباهییه‌كا تایبه‌ت ل مامۆستایێن ئایینی، وپێشمه‌رگێن قاره‌مان، وخێزانێن شه‌هیدێن سه‌ربلند دكه‌ین، وهیڤیخوازین خودایێ مه‌زن هه‌می كارێن وه قه‌بول بكه‌ت وب خه‌لاتێ به‌هشتێ وه شاد بكه‌ت.
هه‌روه‌سا جه‌ژنا ره‌مه‌زانێ ل خوشك وبرایێن خۆ د هه‌می ئورگانێن یه‌كگرتووی ئیسلامی كوردستاندا پیرۆز دكه‌ین وهیڤیخوازین ئه‌و هه‌می ماندیبوون وچالاكی وخزمه‌تا وه پێشكێشی خه‌لكێ مه یێ خۆشتڤی كری خودێ ژوه قه‌بول بكه‌ت وسه‌رفه‌رازیێ بكه‌ته به‌هرا وه.
ئه‌نجومه‌نی كاروباری بانگه‌واز
یه‌كگرتووی ئیسلامی كوردستان
29 ره‌مه‌زانێ 1439
14/6/2018