بسم الله الرحمن الرحیم
پەیاما ئەنجومەنێ كاروبارێت بانگەوازیێ ب هەلكەفتا ژدایكبوونا پێغەمبەری سلاڤ لێ بن
قال تعالی ( ؤمَا أَرْسَلْنَاكَ إِلَّا رَحْمَةً لِّلْعَالَمِينَ ) الانبیا‌و 107
ب هەلكەفتا ژدایكبوونا پێشەوایێ مرۆڤایەتیێ وسەروەرێ پێغەمبەران محمد سلاڤ لێ بن، ئەم ل ئەنجومەنێ كاروبارێت بانگەوازیێ یێ یەكگرتووی ئیسلامی كوردستان جوانترین و بهاترین پیرۆزباهیێن خۆ ئاراستەی تەڤایا مرۆڤایەتیێ وموسلمانێت جیهانێ و كوردستانێ و هەمی دلسۆز و وەفادارێت رێبازا پێغەمبەری سلاڤ لێ بن دكەین، وهیڤیدارین ئەڤ بیرهاتنە وپەیاما پێغەمبەری ببیتە هێڤێنێ برایەتی وپێكڤەژیانێ وبەرقراربوونا ئاشتی وئارامیێ ل وەلاتێ مە و هەمی جیهانێ.
خویشك و برایێت هێژا
ساخكرنا ڤێ بیرهاتنی ڕامانێت پڕ بها د هزر و بیر و دل و دەروونێ موسلماناندا یێت هەین، ونیشانا حەژێكرن و ڤیانێ یە، و رەنگڤەدانا وەفاداری و دلسۆزیێ یە دگەل پێغەمبەری سلاڤ لێ بن، و دەربرینا حەز و ڤیانا ل دویفچۆن وپێگیریێ یە ب رێك و رێباز و رەوشت و سالۆخەتێن جوان یێت پێغەمبەر پێ هاتی، ژبۆ گەهشتنێ ب ژیانەكا شاد و بەختەوەر و پاشەڕۆژەكا ئارام و سەرفەراز، و ئەڤرو موسلمان ل هەمی جیهانێ ب رێك و رەنگین جودا دەربرینێ ژ ڤێ بیرهاتنێ دكەن ب مەرەما زیندی راگرتنا هەمی بها و بنەما و رەوشتیێت بەرز و بلند یێت پیغەمبەر پێ هاتی، و ژ وان:-
• گرنگیا پەروەردەكرن و فێركرنێ د گەشەپێدانا شیانێت مرۆڤی و پێشئێخستنا كومەلگەهیدا، و دیاركرنا رولێ پێغەمبەری د ڤی بیاڤیدا، وەك ماموستا و رێنیشاندەر و رزگاركەرێ مرۆڤایەتیێ ژ نەزانین و تاریاتیێ بەرەف باوەری و زانینێ وەك خودایێ مەزن دبیژیت: (هُؤ الَّذِي بَعَثَ فِي الْأُمِّيِّينَ رَسُولًا مِّنْهُمْ يَتْلُو عَلَيْهِمْ يَ‌يَاتِهِ ؤيُزَكِّيهِمْ ؤيُعَلِّمُهُمُ الْكِتَابَ ؤالْحِكْمَةَ ؤإِن كَانُوا مِن قَبْلُ لَفِي ضَلَالٍ مُّبِينٍ )الجمعة 2 .
• باشتر نیاسینیا پێغەمبەری سلاڤ لێ بن و بلندراگرتنا مەزناتیا رەوشت و رەفتار و سەرەداریا وی دگەل هەمی تەخ و جوینێن كومەلگەهی بهەمی جوداهیێن خۆڤە، وەك خودایێ مەزن پەسنا وی دكەت و دبێژیت: (ؤإِنَّكَ لَعَلَيٰ خُلُقٍ عَظِيمٍ) القلم 4. ب مەرما چاڤلێكرن و دویفچۆنا وی د هەمی بیاڤێت ژیانێدا، وەك خودایێ مە دبێژیت: (لَّقَدْ كَانَ ڵكُمْ فِی رَسُولِ اللَّهِ أُسْۆەٌ حَسَنَەٌ) الاحزاب 21 .
• خەمخوری و هەول و بزاڤێت وی یێت بەردەوام د بیاڤێ بانكخوازی و چاكسازیێدا د هەمی وەخت و كاوداناندا ژبۆ رزگاركرنا مرۆڤان ژ سەرداچۆنێ وبەرزەبوونێ وەك خودایێ مەزن دبێژیت: (لَقَدْ جَا‌وَكُمْ رَسُولٌ مِّنْ أَنفُسِكُمْ عَزِيزٌ عَلَيْهِ مَا عَنِتُّمْ حَرِيصٌ عَلَيْكُم بِالْمُؤْمِنِينَ رَ‌وُوفٌ رَّحِيمٌ ) التوبە 128 .
هێژایان
د وی دەمێ پێغەمبەر سلاڤ لێ بن پەیدا دبیت، مرۆڤایەتی د ئالۆزترین و دژوارترین كاوداندا بووو، و هەمی رەنگێت ستەم و زورداریێ و ماف خوارن د بەربەلاڤ بوون، وەك كوشتن، و تالانكرن، و برسیكرن، و بەنداتیكرن، و بەدرەوشتی. لەوما پێغەمبەر سلاڤ لێ بن ب پشتەڤانیا خودایێ مەزن و ب رێك و رێبازەكا راست و دیار و ب ئیرادە و هێزەكا پیلایی شیا د دمەكێ كورتدا زال بیت لسەر هەمی گرفت و ئاستەنگا و دەرفەتێت ئاڤاكرنا مرۆڤەكێ چاك و پەیامدار، و كومەلگەهەكێ ساخلەم و چاكساز و ئێكگرتی پەیدابكەت، و شارستانیەكا دانای لسەر بنەمایێت برایەتی، و ئازادی، و دادپەروەری، و وەكهەڤیێ پێشكێشی مرۆڤایەتیێ بكەت.
خویشك برایێت هێژا
ئەڤرو ئەم ل كوردستانێ ڤێ بیرهاتنێ ساخ دكەین، و وەلاتێ مە د سەخترین و دژوارترین قەیرانا سیاسی و دارایی دایە، ب تایبەت پشتی ئەنجامدانا ریفراندۆمێ وەك ئامرازەكێ دیموكراسی و مەدەنی ژبۆ دیاركرنا حەز و بژاردەیێت چەوانیا رێكخستنا قەوارێ سیاسی یێ هەرێما كوردستانێ.
لێ جارەكا دی مللەتی مە كەفتە بەر گەف و پیلانێت وەلاتێت دەوروبەر، و بەرژەوەندێت وەلاتێن زلهێز بەروڤاژی حەز و ئیرادەیا مللەتێ مە بوون، و جارەكا دی مللەتێ مە تووشی دەردەسەری و ئاوارەبوون و مال سوتنێ بوون ب تایبەت ل كەركۆك و دۆز و شنگال و مەخمورێ و گەلەك جهێن دی.
لەو ما پێدڤیە ڤێ هەلكەفتا پیرۆز بكەینە دەرفەتەك بۆ دەربازبوون ژ ڤان قەیرانان و هەولدان بۆ چارەسەركرنەكا ڕیشەیی بۆ هەمی كوسب و بەربەستان ب ئامانجا دابینكرنا پاشەڕۆژەكا باشتر و گەشتر بۆ مللەت و وەلاتی، ب كاركرن و پێگیری ب ڤان ئەركان وەك پێدڤیێت ڤێ قوناغا هەستیار:-
1- پاراستنا گیانێ برایەتی و پێكڤەژیانێ و ئێكرێزیا نیشتیمانی، و لێك تێگەهشتن و ئێك هەلویستی بەرامبەر چەوانیا سەرەدەریكرنێ دگەل ئاستەنگ و بەربەستان و هەولدان بۆ كێمكرن و نەهێلانا ناكوكیێت ناڤخویی و رێكەفتن لسەر پاراستنا بەرژەوەندێت بلند یێت مللەتی.
2- ئەنجامدانا چاكسازیەكا ڕیشەیی د هەمی بیاڤاندا، و كاركرن ژبۆ یاسا سەروەریێ، و بەرسینگگرتنا گەندەلیێ، و چارەسەركرنا قەیرانا دارایی، و نەهێلانا هەمی رەنگێت ستەم و مافخوارنێ و نەدادپەروەریێ د ناڤ كومەلگەهیدا.
3- هەولدان بۆ ڤەكرنا دەرگەهێت دیالوك ودان و ستاندنێ دگەل بەغدا و وەلاتێت دەوروبەر ژبۆ بدەستڤەئینانا مافێت دەستۆری و پاراستنا بەرژەوەندێت بلند یێت خەلكێ كوردستانێ.
4- هاریكاریا خەلكێ زیان ڤێكەفتی و ئاوارەیێت كەركووك و دۆز و هەمی ناوچەیێت كوردستانێ ئەوێت ژ ئەگەرێ شەری و ناكوكیان مالێت خۆ بجه هێلاێن و تووشی زیانەكا مەزن بووین.
دووبارە پیرۆزباهیێت خۆ ئاراستەی هەمی موسلمانێت جیهانێ و كوردستانێ دكەین، و هیڤی خوازین خودایێ مەزن پشتەڤان و هاریكارێ مە و مللەتێ مە بیت لسەر پێگیری و ل دویفچۆنا رێك و رێباز و رەوشتێت پێغەمبەری سلاڤ لێ بن، و مللەت و وەلاتێ مە رزگار بكەت ژ هەمی ئاستەنگ و قەیران و گرفتان.
ئەنجومەنێ كاروبارێت بانگەوازیێ
یەكگرتووی ئیسلامی كوردستان
11 ربیع الاول 1439م 29/11/2017