فراكسیۆنی یەكگرتووی ئیسلامی كوردستان لەئەنجومەنی پاریزگای سلێمانی ڕونكردنەوەیەكی لەسەر هەڵوەشاندنەوەی لیستی خزمەت بڵاوكردەوە كەتێیدا هاتووە: بەهۆی ئامادەنەبونی سەرۆكی فراكسیۆنی كۆمەڵی ئیسلامی لە ئەنجومەنی پارێزگای سلێمانی بۆماوەی زیاتر لە 18 مانگ و هەروەها فراكسیۆنی كۆمەڵی ئیسلامی كوردستان سەبارەت بە ئەجیندای كۆبوونەوەی ژمارە 40ی ئەنجومەنی پاریزگای سلیمانی لەگەل فراكسیۆنی بزوتنەوەی گۆڕان ڕوونكردنەوەیەكی هاوبەشیان بڵاو كردەوە , بەبێ گەرانەوە بۆ فراكسیۆنی خزمەت!، ئەمە واتای هەڵوەشاندنەوەی فراكسیۆنی خزمەتە بە عەمەلی لەلایەن برایانی كۆمەڵی ئیسلامی یەوە.
دەقی ڕاگەیەندراوەكەی فراكسیۆنی یەكگرتووی ئیسلامی كوردستان لەئەنجومەنی پارێزگای سلێمانی:
فراكسیۆنی خزمەت هەڵوەشاوەتەوە.......
بۆ بەرجاو ڕوونی هەموو لایەك بە پێویستی دەزانین هەموو لایەك ئاگادار بكەینەوە كە لەبەرواری ٢٠١٧/١١/١ سەرۆكی لیستی كۆمەڵی ئیسلامی كوردستان لە ئەنجومەنی پاریزگای سلیمانی و بەڕێز سەرۆكی ئەنجومەنی پاریزگای سلێمانیمان ئاگاداركردووەتەوە لەوەی لەدوای ئەو بەروارەوە هەردوو لیستی كۆمەڵی ئیسلامی و یەكگرتووی ئیسلامی وەك دوو لیستی سەربەخۆ كار و چالاكی یەكانی خۆیان لە ئەنجومەنی پاریزگای سلیمانی دریژە پێدەدەن لە بەر ئەم خاڵانەی خوارەوە:
١. لەماوەی ١٨ مانگی رابردوودا بە هۆی ئەوەی بەڕێز (فەیسەڵ ابراهیم ) ئەندامی فراكسیۆنی خزمەت لە پشكی كۆمەڵی ئیسلامی كە پێشتر سەرۆكی فراكسیۆنەكەش بووە پابەند نەبووە بە دەوام كردن و كەمتەرخەم بووە لە ئەداكردنی ئەركەكانی وەك ئەندامی ئەنجومەن و مانەوەی لە وڵاتی بەریتانیا بە بێ مۆڵەت , چەندین جار برایانی ئەنجومەنی سیاسی كۆمەڵی ئیسلامیمان ئاگاداركردووەتەوە لەوەی بەرێزیان ئەندامێكی فراكسیۆنەكەمانە و ئامادەنین سازش لە خەمساردی بەڕێزیان بكەین لە ئیش و كاری ئەنجومەندا , لەبەرئەوەی هەریەك لەئێمە نوێنەرایەتی ٢٨ بیست و هەشت هەزار دەنگدەر دەكەین ,داوامان كردووە یان پابەند بێت بە ئەركەكەیەوە یاخود ئەندامێكی تری كۆمەڵی ئیسلامی جیگای بگرێتەوە , لەكاتیكدا لەو ماوە زۆرەدا ئەم فراكسیۆنە لەبری چوار ئەندام تەنها سێ ئەندام لەكاردابوون , بەداخەوە نەیانتوانی وەلامێكی عەمەلیمان بدەنەوە ..هەر لەم بارەیەوە جەندین جار سەرۆكایەتی ئەنجومەنیشمان ئاگادار كردووەتەوە كە بەپێی یاسا مامەڵە لەگەل ئەم بابەتەدا بكات .
٢. بەرێزان فراكسیۆنی كۆمەڵی ئیسلامی كوردستان سەبارەت بە ئەجیندای كۆبوونەوەی ژمارە (٤٠)ی ئەنجومەنی پاریزگای سلیمانی , لەگەل فراكسیۆنی بزوتنەوەی گۆڕان ڕوونكردنەوەیەكی هاوبەشیان بڵاو كردەوە , بەبێ گەرانەوە بۆ فراكسیۆنی خزمەت ! لەكاتێكدا لە چوارچێوەی كاری ئەنجومەنی پاریزگای سلیمانی بەفەڕمی تەنها فراكسیۆنێكمان هەیە بەناوی (فراكسیۆنی خزمەت ) نەك فراكسیۆنی یەكگرتوو یان فراكسیۆنی كۆمەڵ , كە ئەمەش واتای هەڵوەشاندنەوەی فراكسیۆنی خزمەتە بە عەمەلی لەلایەن برایانی كۆمەڵی ئیسلامی یەوە , ئێمەش بە پێویستمان زانی ڕێز لە ویستی بەڕێزیان بگرین ...هەر بۆیە لە ئایندەدا وەك دوو فراكسیۆنی سەربەخۆ دریژە بەكاری خۆمان دەدەین و ئەم هەنگاوەش هیچ كاریگەریەكی نابێت لە پەیوەندی برایەتی و كاری هاوبەشماندا .......
لەگەڵ ڕێزدا
فراكسیۆنی یەكگرتووی ئیسلامی كوردستان
لەئەنجومەنی پاریزگای سلێمانی