دژی كۆمەڵكوژی موسڵمانانی بۆرما ئەنجوومەنی باڵای یاساناسانی یەكگرتووی ئیسلامی كوردستان بەیاننامەیەكی بڵاوكردەوەو ئاماژەی بەوەكردووە: لە ساتەوەختی بانگەشەی مافەكانی مرۆڤ و چەسپاندنی بنەماكانیدا و بەگژداچوونەوەی تووندڕەوی و تیرۆر لەلایەن زلهێزانی ئەمڕۆی جیهانەوە، گەلێك بە تووندترین و قێزەونترین شێوە جینۆساید دەكرێت و شار بەدەر دەكرێن و دەست بەسەر موڵك و سامانییاندا دەگیرێت، كە پێچەوانەی یاسا نێودەوڵەتییەكان و پرنسیپەكانی دیموكراسی و بنەماكانی مافی مرۆڤە.
دەقی بەیاننامەكە:
بەناوی خودای باڵادەست
بەیاننامەی ناڕەزایی ئەنجوومەنی باڵای یاساناسانی یەكگرتووی ئیسلامی كوردستان
لە ساتەوەختی بانگەشەی مافەكانی مرۆڤ و چەسپاندنی بنەماكانیداو بەگژداچوونەوەی تووندڕەوی و تیرۆر لەلایەن زلهێزانی ئەمڕۆی جیهانەوە، گەلێك بە تووندترین و قێزەونترین شێوە جینۆساید دەكرێت و شاربەدەر دەكرێن و دەست بەسەر موڵك و سامانییاندا دەگیرێت، كە پێچەوانەی یاسا نێودەوڵەتییەكان و پرنسیپەكانی دیموكراسی و بنەماكانی مافی مرۆڤە، ئێمە وەكو گەلی كورد زۆر لەو ئازارو زامانەمان چەشتووەو دیمەنی تاڵی جینۆسایدی كیمیابارانی هەڵەبجەو تاوانەكانی ئەنفالـمان دەخاتەوە یاد، گەلی ڕۆهینگیا لەناو چەندین ئاین و ئاینزاو هۆزو كەمە نەتەوایەتیدا ژیان بەسەر دەبەن لە ووڵاتی بۆرما، كە زەمەنێكی دوورو درێژە دەچەوسێنرێنەوەو لە تارمایی شەوەزەنگی ستەمدا چاوەڕوانی تیشكی ڕووناكی و شوعلەی ئازادی دەكەن، بۆیە ئێمە وەكو توێژی یاساناسان ئیدانەی ئەو كارە نامرۆڤانەو بە جینۆساید ناساندنی ئەو تاوانانەو گەیاندنی دۆسیەكە بە دادگای تاوانی نێودەوڵەتی و نەتەوە یەكگرتووەكان و سزادانی تاوانباران دەكەین، هەروەها پێدانی مافی یاسایی هاوڵاتی بوون و مافی گەشت كردن وەكو مافێكی سەرەتایی و دووبارە گەڕانەوەی كەشێكی ئارام و زەمینەیەكی لەبار بۆ پێكەوەژیان لەنێوان ئاینزاو كەمەنەتەوایەتییەكان لە بۆرما...
ئەنجوومەنی باڵای یاساناسانی یەكگرتووی ئیسلامی كوردستان
6/ 9 / 2017 – 4 شەممە / هەولێر
ئـ . كـ