پێشنیوەڕۆی ئەمڕۆ یەك شەممە 14-2-2021، بەڕێز مامۆستا سەلاحەدین محەمەد بەهائەدین ئەمینداری گشتی یەكگرتووی ئیسلامی كوردستان بەئامادەبونی شاندێك پێشوازیكرد لەبەڕێز سەركونسوڵی كۆماری ئیسلامی ئێران (مهدی شوشتەری) و شاندی هاوڕێی لەنوسینگەی سلێمانی ئەنجومەنی جێبەجێكردنی یەكگرتووی ئیسلامی كوردستان.
سەركونسوڵی كۆماری ئیسلامی ئێران لە (27)هەمین ساڵیادی یەكگرتووی ئیسلامی كوردستان پیرۆزبایی كۆماری ئیسلامی ئێرانی گەیاندە یەكگرتووی ئیسلامی و وە هیوای سەركەوتنی زۆرتری بۆ یەكگرتوو خواست..
هەر لە دیدارەكەدا گفتوگۆ لەسەر بارودۆخی سیاسی و پێشهاتە نوێكان لەناوچەكە كرا، هەردولا هاوڕابوون كە پێویستە هەرێمی كوردستان و بەغدا گفتوگۆكانیان جدی تر بكەن و بگەن بەڕێككەوتن لەسەر بودجەو موچەی فەرمانبەران، چونكە لەو نێوەندەدا هەر هاوڵاتیان دەبنەقوربانی و ژیان و بژێوی هاوڵاتیانی هەرێم ئەوە دەخوازێ پەلە بكرێت لەڕێككەوتن و لێك تێگەیشتن.
لەلای خۆیەوە بەڕێز مامۆستا سەلاحەدین محەمەد بەهائەدین ئەمینداری گشتی یەكگرتووی ئیسلامی كوردستان وێرای سوپاسی وەفدی میوان پیرۆزبایی ساڵیادی كۆماری ئیسلامی ئێرانی پێشكەش كرد بە بەڕێز سەركونسوڵی ئێران و هیوای سەركەوتنی ئاشتی و ئارامی ناوچەكەی خواست.